Ուկրաինական դրոնները երկրորդ գիշեր անընդմեջ հարձակվել են Մոսկվայի վրա՝ ստիպելով մայրաքաղաքի չորս օդանավակայաններում դադարեցնել թռիչքները։ Մոսկվայի քաղաքապետ Սերգեյ Սոբյանինը հայտնել է, որ ոչնչացվել է առնվազն 19 դրոն, իսկ Ռուսաստանի Պաշտպանության նախարարությունը նշել է, որ ողջ երկրի տարածքով որսվել է 105 դրոն։
Հարձակումը տեղի է ունենում հենց այն պահին, երբ Ռուսաստանը պատրաստվում է Մայիսի 9-ի Հաղթանակի օրվա շքերթին, որին սպասվում է նաև Չինաստանի առաջնորդ Սի Ծինփինի մասնակցությունը։ Այլ առաջնորդների թվում են Բրազիլիայի նախագահ Լուլա դա Սիլվան, Վիետնամի նախագահ Տո Լամը և Բելառուսի առաջնորդ Ալեքսանդր Լուկաշենկոն։
Ռուսաստանի նախագահ Վլադիմիր Պուտինը մեկ ամիս առաջ հայտարարել էր երեքօրյա միակողմանի հրադադար Ուկրաինայում՝ Մայիսի 9-ի միջոցառումներին զուգահեռ։ Սակայն Ուկրաինայի նախագահ Վլադիմիր Զելենսկին մերժել է այդ առաջարկը՝ պահանջելով առնվազն 30-օրյա երկարատև հրադադար։
Զելենսկին նաև զգուշացրել է, որ Ուկրաինան պատասխանատու չէ ռուսական տարածքում հնարավոր զարգացումների համար, և նշել է, որ իր երկիրը չի պատրաստվում ձևացնել խաղաղ մթնոլորտ՝ Պուտինին մեկուսացումից դուրս բերելու համար։
Ռուսաստանի ԱԳՆ-ն Զելենսկու հայտարարությունները գնահատել է որպես սպառնալիք։ Միևնույն ժամանակ, Կիևը պահանջում է բացատրություն Չինաստանից՝ կապված ապրիլին ուկրաինացիների կողմից երկու չինացի մարտիկների գերեվարման հետ։