Կիոտոյի համալսարանի գիտնականները ներկայացրել են անսպասելի լուծում դեպրեսիայի դեմ պայքարում՝ սմարթֆոնները վերածելով հոգեբանական աջակցության գործիքի։ Նրանք ստեղծել են RESiLIENT անվանմամբ բջջային հավելված, որը հիմնված է ճանաչողական-վարքային թերապիայի (ՃՎԹ) սկզբունքների վրա։
Հավելվածը փորձարկվել է գրեթե 4000 ճապոնացիների վրա, ովքեր տառապում էին ենթադեպրեսիայով՝ վիճակ, որը չնայած թեթև է, կարող է լուրջ վնաս հասցնել կյանքի որակին։
RESiLIENT-ը սովորեցնում է օգտատերերին հինգ հիմնական տեխնիկա՝ վարքագծային ակտիվացում, մտածողության վերակառուցում, խնդիրների լուծում, ինքնավստահության զարգացում և անքնության դեմ պայքար։
Հետազոտությունը ցույց է տվել, որ հավելվածի վեցշաբաթյա օգտագործումը բերում է կայուն արդյունքների՝ նվազեցնելով ոչ միայն դեպրեսիայի, այլև տագնապի ու անքնության նշանները։ Ավելին, արդյունքները համեմատելի են հակադեպրեսանտների ազդեցության հետ՝ առանց լուրջ կողմնակի ազդեցությունների։
Հետազոտության ղեկավար, պրոֆեսոր Տոշիակի Ֆուրուկավան ընդգծել է, որ RESiLIENT-ը կարող է անհատականացվել՝ օգտատիրոջ կոնկրետ կարիքներին համապատասխան, ինչը նոր ուղի է բացում երկարաժամկետ հոգեբանական աջակցության համար։ Հաջորդ փուլում թիմը մշակում է նոր հարթակ՝ տարվա ընթացքում շարունակական աջակցություն ցուցաբերելու նպատակով։
